ఆమద్య పవన్‌ కళ్యాణ్‌, కత్తి మహేష్‌ విషయంలో ఇన్వాల్వ్‌ అయ్యి రచ్చ రచ్చ చేసిన ముద్దుగుమ్మ పూనమ్‌ కౌర్‌. ఈమె దర్శకుడు త్రివిక్రమ్‌పై తీవ్ర స్థాయిలో విమర్శలు చేసిన విషయం తెల్సిందే. ఈమద్య కూడా కాస్టింగ్‌ కౌచ్‌ విషయంలో సంచలన ఆరోపణలు చేసిన పూనం కౌర్‌ హీరోయిన్‌గా పెద్దగా అవకాశాలు దక్కించుకోలేక పోతుంది. దాంతో క్యారెక్టర్‌ ఆర్టిస్టుగా సర్దుకు పోతుంది. ప్రస్తుతం ప్రతిష్టాత్మక సీరియల్‌ స్వర్ణఖడ్గం చిత్రంలో ముఖ్య పాత్రలో నటిస్తున్న ఈమె తాజాగా శ్రీనివాస కళ్యాణం చిత్రంలో హీరోయిన్‌ అక్క పాత్రలో కనిపించింది. ఆ పాత్రలో మంచి నటనతో మెప్పించింది. తాజాగా ఈమెకు సైరా చిత్రం నుండి పిలుపు వచ్చినట్లుగా సమాచారం అందుతుంది.
‘సైరా’ చిత్రంలోని ఒక పాత్ర కోసం చిత్ర యూనిట్‌ సభ్యులు ఆడిషన్స్‌ నిర్వహించడం జరిగింది. ఆ ఆడిషన్స్‌లో పూనమ్‌ కౌర్‌ ఎంపిక అయినట్లుగా సమాచారం అందుతుంది. త్వరలోనే ఈమె సైరా చిత్ర యూనిట్‌ సభ్యులతో కలువబోతుంది. ఈ విషయమై త్వరలోనే క్లారిటీ వచ్చే అవకాశం ఉంది. చిరంజీవి 151వ చిత్రం అయిన సైరా నరసింహారెడ్డిని నిర్మాత రామ్‌ చరణ్‌ ప్రతిష్టాత్మకంగా నిర్మిస్తున్నాడు. సురేందర్‌ రెడ్డి దర్శకత్వంలో భారీ అంచనాల నడుమ రూపొందుతున్న ఈ చిత్రంలో చిన్న పాత్ర అయినా దక్కితే చాలు అని చాలా మంది కోరుతున్నారు. ఇలాంటి నేపథ్యంలో ఈమెకు ఆ ఛాన్స్‌ రావడంతో ఎగిరి గంతేసినంత పని చేస్తుంది. ప్రస్తుతం సైరా చిత్రం కోసం హైదరాబాద్‌ శివారు ప్రాంతంలో భారీ యాక్షన్‌ సీన్స్‌ చిత్రీకరణ జరుపుతున్నారు. వచ్చే ఏడాది వేసవి కానుకగా ఈ చిత్రాన్ని విడుదల చేయబోతున్నారు.
