యంగ్ రెబల్ స్టార్ ప్రభాస్ తెలంగాణలోని పెద్దపల్లి జిల్లా గోదావరిఖని ప్రాంతంలో సందడి చేశారు. ప్రస్తుతం ఆయన కన్నడ దర్శకుడు, ‘కేజీఎఫ్’ ఫేమ్ ప్రశాంత్ నీల్ దర్శకత్వంలో ‘సలార్’ అనే చిత్రంలో నటిస్తున్న సంగతి తెలిసిందే. ఇటీవలే ఈ సినిమా షూటింగ్ హైదరాబాద్‌లో లాంఛనంగా ప్రారంభమైంది. ఫస్ట్‌లుక్ కూడా సినీ ప్రేక్షకులను విశేషంగా ఆకట్టుకుంది. ఈ సినిమాలో శ్రుతిహాసన్‌ను హీరోయిన్‌గా తీసుకుంటున్నట్లు తాజాగా యూనిట్ ప్రకటించింది. అభిమానులు ఆ సందడిలో ఉండగానే శుక్రవారం ప్రభాస్ గోదావరి ఖనిలో వాలిపోయాడు.
గోదావరి ఖని పరిధి రామగిరి మండలంలోని సింగరేణి ఓపెన్‌ కాస్ట్ ప్రాంతంలో ‘సలార్’ మొదటి షెడ్యూల్ షూటింగ్ జరుపుకుంటోంది. ఆర్జీ-3 పరిధిలోని ఓసీపీ-2 ప్రాజెక్టు దగ్గర వేసిన భారీ సెట్‌లో యాక్షన్ సీక్వెన్స్‌ చిత్రీకరించనున్నారు. సుమారు 10 రోజుల పాటు ఇక్కడ షూటింగ్ జరగనున్నట్లు సమాచారం .ఈ క్రమంలోనే శుక్రవారం రామగుండం కమిషనరేట్‌కు వచ్చిన ప్రభాస్ రామగుండం పోలీస్ కమిషనర్ సత్యనారాయణతో కాసేపు మాట్లాడారు. ఈ సందర్భంగా సీపీ సత్యనారాయణ ప్రభాస్‌కు తన సిబ్బందిని పరిచయం చేశారు. పలువురు పోలీసు సిబ్బంది ఆయనతో ఫోటోలు దిగేందుకు పోటీపడ్డారు. ఈ ఫోటోలు ప్రస్తుతం సోషల్‌మీడియాలో వైరల్‌గా మారాయి.