టాలీవుడ్లో సహాయ నటిగా, తల్లి పాత్రలతో తనకంటూ ప్రత్యేక గుర్తింపు తెచ్చుకున్న నటి ప్రగతి. ఎన్నో సూపర్ హిట్ చిత్రాల్లో సహజమైన నటనతో ప్రేక్షకుల మనసు గెలిచిన ఆమె, సినిమాలకే కాదు ఫిట్నెస్ విషయంలోనూ ఎప్పుడూ ట్రెండింగ్లో ఉంటారు.
ఇటీవల ఇచ్చిన ఓ ఇంటర్వ్యూలో తన సినీ ప్రయాణానికి సంబంధించిన పలు ఆసక్తికర విషయాలను ప్రగతి పంచుకున్నారు. ఆ సందర్భంగా ఆమె ఎదుర్కొన్న ఓ చేదు అనుభవాన్ని కూడా ఓపెన్గా వెల్లడించారు. తన కెరీర్లో ఓ దర్శకుడితో పని చేసిన సమయంలో తీవ్ర ఇబ్బందులు ఎదురయ్యాయని, ఆ షూటింగ్ తనకు నరకంలా అనిపించిందని చెప్పారు.
“ఆ దర్శకుడి పేరు ఇప్పుడు సరిగ్గా గుర్తులేదు. కానీ షూటింగ్ మొదలైన రెండో రోజే అతనితో మళ్లీ ఎప్పటికీ పని చేయకూడదని గట్టిగా నిర్ణయించుకున్నాను. నా కెరీర్లో అలాంటి పరిస్థితిని ఎదుర్కొన్నది అదే ఫస్ట్ అండ్ లాస్ట్” అని ఆమె స్పష్టంగా తెలిపారు.
ఇక సినిమాల విషయంలో తనకు రెమ్యునరేషన్ కంటే పవర్ఫుల్ క్యారెక్టర్స్నే ముఖ్యమని ప్రగతి చెప్పారు. పాత్ర నచ్చితే తక్కువ పారితోషికానికైనా పని చేస్తానని, కథ బలంగా లేకపోతే ఎంత పెద్ద ఆఫర్ వచ్చినా తిరస్కరిస్తానని కుండబద్దలు కొట్టారు. చిన్న సినిమాలు, పెద్ద సినిమాలు అన్న తేడా నటనలో ఉండదని, మారేది కేవలం బడ్జెట్ మాత్రమేనని ఆమె అభిప్రాయపడ్డారు. తన కెరీర్లో నటించిన సినిమాల్లో 99 శాతం రిలీజ్ కావడం తనకు ఎంతో సంతృప్తినిస్తోందని అన్నారు.
ఇక ఫిట్నెస్ విషయానికి వస్తే, 50 ఏళ్ల వయసులోనూ పవర్ లిఫ్టింగ్లో మెడల్స్ సాధిస్తూ ప్రగతి అందరికీ ఆదర్శంగా నిలుస్తున్నారు. ఇప్పటికే ఆసియా స్థాయిలో రాణించిన ఆమె, తదుపరి కామన్వెల్త్ గేమ్స్లో పాల్గొనడమే తన లక్ష్యమని వెల్లడించారు. ఎంత బిజీ షూటింగ్ షెడ్యూల్ ఉన్నా రోజూ కనీసం రెండు నుంచి మూడు గంటలు వర్కౌట్ చేయడం తన డైలీ రొటీన్ అని చెప్పారు. 90 ఏళ్ల వయసులో కూడా ఇలానే యాక్టివ్గా ఉండాలన్నదే తన జీవిత లక్ష్యమని ప్రగతి తెలిపారు.