Posted [relativedate] at [relativetime time_format=”H:i”]
యంగ్‌ టైగర్‌ ఎన్టీఆర్‌, మాటల మాంత్రికుడు త్రివిక్రమ్‌ల కాంబినేషన్‌లో ఒక చిత్రం తెరకెక్కబోతున్న విషయం తెల్సిందే. ఇటీవలే పవన్‌ చేతుల మీదుగా వీరి కాంబో మూవీ లాంచనంగా ప్రారంభం అయ్యింది. ప్రస్తుతం పవన్‌25వ చిత్రానికి త్రివిక్రమ్‌ దర్శకత్వం వహిస్తున్నాడు. సంక్రాంతికి పవన్‌ 25వ చిత్రం అజ్ఞాతవాసి విడుదలకు సిద్దం అవుతుంది. పవన్‌ మూవీ విడుదలైన వెంటనే ఎన్టీఆర్‌తో చేయబోతున్న మూవీ రెగ్యులర్‌ షూటింగ్‌ను ప్రారంభించేందుకు త్రివిక్రమ్‌ ప్లాన్‌ చేశాడు. జనవరి చివర్లో లేదా ఫిబ్రవరిలో సినిమాను సెట్స్‌ మీదకు తీసుకు వెళ్లబోతున్నట్లుగా నిర్మాత రాధాకృష్ణ పేర్కొన్నాడు.
ఈ చిత్రంలో ఎన్టీఆర్‌కు జోడీగా పూజా హెగ్డే మరియు మెహ్రీన్‌లను పరిశీలిస్తున్నారు. వీరిద్దరితో ఇప్పటికే నిర్మాత రాధాకృష్ణ చర్చించడం జరిగిందని తెలుస్తోంది. ఇక ఇదే సినిమాలో నిన్నటి తరం స్టార్‌ హీరోయిన్‌ టబును ఎంపిక చేయాలని నిర్ణయించారు. ‘అత్తారింటికి దారేది’ చిత్రంలో నదియ పాత్రకు ఎంత ప్రాముఖ్యత ఉంటుందో, అలాగే ఈ సినిమాలో కూడా ఒక పాత్రకు అంతే ప్రాముఖ్యత ఉంటుంది. అందుకే ఆ పాత్రకు స్టార్‌ హీరోయిన్‌ అయితే బాగుంటుందని, నిన్నటి తరం స్టార్‌ హీరోయిన్‌ అయిన టబు తెలుగులో నటించేందుకు ఆసక్తిగా ఉందని తెలుసుకున్న దర్శకుడు ఆమెతో చర్చలు జరపడం జరిగింది.
ఇటీవలే నాగార్జునతో ఒక తెలుగు సినిమాను చేసేందుకు కమిట్‌ అయిన టబు మరో సినిమాను చేసేందుకు కూడా తాను సిద్దం అంటూ త్రివిక్రమ్‌కు మాట ఇచ్చింది. ఎన్టీఆర్‌కు క్లోజ్‌ రిలేటివ్‌ పాత్రలో టబు కనిపించనున్నట్లుగా తెలుస్తోంది. టబును తీసుకోవడం వల్ల అందరి దృష్టి సినిమాపైకి మారడంతో సినిమాకు మంచి పబ్లిసిటీ దక్కుతుందనే ఉద్దేశ్యంతో త్రివిక్రమ్‌ ఈ నిర్ణయం తీసుకున్నాడు. వచ్చే సంవత్సరం చివర్లో సినిమాను విడుదల చేస్తానంటూ దర్శకుడు త్రివిక్రమ్‌ చెబుతున్నాడు. వరుసగా విజయాలు దక్కించుకుంటున్న ఎన్టీఆర్‌కు త్రివిక్రమ్‌ మరో భారీ బ్లాక్‌ బస్టర్‌ను ఇవ్వడం ఖాయం అంటున్నారు. తెలుగులో చాలా కాలం తర్వాత టబు నటించబోతున్న ఈ సినిమాపై ఆమె అభిమానుల్లో అంచనాలు భారీగా ఉండే అవకాశం ఉంది. ఇక టబు కారణంగా బాలీవుడ్‌లో కూడా ఈ సినిమాపై ఆసక్తి కలిగే అవకాశం ఉంది. పలు విధాలుగా టబు వల్ల లాభం, అందుకే త్రివిక్రమ్‌ తెలివిగా ఈ నిర్ణయం తీసుకున్నాడు.
