లండన్ లోని లార్డ్స్ మైదానం వేదికగా న్యూజిలాండ్, ఇంగ్లాండ్ జట్ల మధ్య వరల్డ్ కప్ 2019 ఫైనల్ ఆదివారం జరగనుంది. గెలిచిన జట్టు ఖాతాలో తొలిసారి వరల్డ్ కప్ చేరనుంది. న్యూజిలాండ్ వరుసగా రెండోసారి ఫైనల్ చేరగా ఇంగ్లాండ్ 1992 తర్వాత ఫైనల్ చేరడం ఇదే మొదటిసారి. సొంత గడ్డ మీద ఈసారి ఎలాగైనా కప్ కొట్టాలని ఇంగ్లాండ్డ కసి మీద ఉండగా 2015 ఫైనల్లో జరిగిన తప్పిదాలను ఈసారి పునరావృతం చేయొద్దని కివీస్ జట్టు భావిస్తోంది. ఈ మెగా ఫైనల్లో సన్‌రైజర్స్‌కు చెందిన ఇద్దరు ఆటగాళ్లు ప్రత్యర్థులుగా బరిలో దిగబోతున్నారు. సన్‌రైజర్స్ కెప్టెన్ కేన్ విలియమ్సన్.. న్యూజిలాండ్ కెప్టెన్‌గా బరిలో దిగుతున్నాడు. అలాగే 2019 ఎడిషన్‌లో సన్‌రైజర్స్ ఓపెనర్‌గా బరిలో దిగిన జానీ బెయిర్‌స్టో ఇంగ్లాండ్ ఓపెనర్‌ అనే సంగతి తెలిసిందే. ఐపీఎల్‌లో వార్నర్‌తో కలిసి హైదరాబాద్ జట్టు తరఫున ఓపెనర్‌గా ఆడిన బెయిర్‌స్టో అదరగొట్టే ప్రదర్శన చేశాడు. ఐపీఎల్ 2019లో 10 మ్యాచ్‌ల్లో 445 పరుగులు చేసిన బెయిర్‌స్టో.. ఈ వరల్డ్ కప్‌లో ఇంగ్లాండ్ తరఫున 10 మ్యాచ్‌ల్లో 496 రన్స్ చేశాడు. న్యూజిలాండ్ ప్లేయర్ మార్టిన్ గుప్టిల్ కూడా సన్‌రైజర్స్ ఆటగాడే కావడం విశేషం. ఎలాగో భారత్ ఫైనల్ చేరలేకపోయింది కాబట్టి ఫైనల్లో ఈ ముగ్గురి సన్‌రైజర్స్ స్టార్ల ఆటను చూసి ఆనందిద్దాం.
