తమిళ సినీ పరిశ్రమలోనే కాకుండా దక్షిణాదిలో భారీ అభిమానాన్ని సంపాదించుకున్న స్టార్ హీరోల్లో అజిత్ కుమార్ (Ajith Kumar) ఒకరు. సినిమాలతో పాటు తన సాహసోపేత జీవనశైలితో కూడా ఆయన ప్రత్యేక గుర్తింపు తెచ్చుకున్నారు. ప్రస్తుతం రేసింగ్పై దృష్టి పెట్టి బిజీగా ఉన్న అజిత్ కుటుంబంలో ఇప్పుడు తీవ్ర విషాదం చోటుచేసుకుంది.
అజిత్ తల్లి మోహిని మణి ఈరోజు ఉదయం కన్నుమూసినట్లు కోలీవుడ్ వర్గాలు వెల్లడించాయి. దీంతో అజిత్ కుటుంబ సభ్యులు, అభిమానులు తీవ్ర దిగ్భ్రాంతికి గురయ్యారు. వయోభారంతో ఏర్పడిన ఆరోగ్య సమస్యల కారణంగా చెన్నైలోని ఆసుపత్రిలో చికిత్స పొందుతూ ఆమె 85 ఏళ్ల వయసులో తుదిశ్వాస విడిచినట్లు సమాచారం.
ఈ విషాద వార్త తెలిసిన వెంటనే తమిళ సినీ ప్రముఖులు, రాజకీయ నాయకులు సంతాపం వ్యక్తం చేస్తున్నారు. కమల్ హాసన్, ఎం.కే. స్టాలిన్, అన్నామలై తదితరులు ఆమె ఆత్మకు శాంతి చేకూరాలని ప్రార్థించారు.