వివాహం చేసుకుంటానని చెప్పి ఓ జ్యోతిషురాలిని మోసం చేసిన బాలీవుడ్ టీవీ నటుడు ఉదంతం బయటకు వచ్చింది. పెళ్లిపేరుతో వంచించడమే కాదు ఆమెతో ఏకాంతంగా గడిపిన దృశ్యాలను వీడియో తీసి బెదిరింపులకు పాల్పడ్డాడు. దీంతో బాధితురాలు పోలీసులకు ఫిర్యాదు చేయడంతో ప్రస్తుతం జైల్లో ఊచలు లెక్కబెడుతున్నాడు. టీవీ నటుడు, మోడల్ కరణ్ ఒబెరాయ్‌ ప్రేమ పేరుతో ముంబైలోని ఓషీవరాకు చెందిన ఓ జ్యోతిష్యురాలికి దగ్గరయ్యాడు. పెళ్లి చేసుకుంటానని నమ్మించి ఆమెను లోబరుచుకున్నాడు. పలుమార్లు ఆమెపై అత్యాచారం చేయడమే కాదు, వీటిని వీడియో తీశాడు. ఈ వీడియోలతో బాధితురాలిని బ్లాక్‌మెయిల్ చేస్తూ, తనకు అడిగినంత ముట్టజెప్పాలని, లేకపోతే వాటిని బయటపెడతానని బెదిరించాడు. అతడి బెదిరింపులు ఎక్కువ కావడంతో బాధితురాలు పోలీసులకు ఫిర్యాదు చేసింది. ఆమె ఫిర్యాదు ఆధారంగా అతడిపై అత్యాచారం, దోపిడీ తదితర సెక్షన్ల కింద కేసు నమోదు చేశారు. కరణ్ ఒబెరాయ్‌ను అదుపులోకి తీసుకుని న్యాయస్థానం ముందు హాజరుపరచడంతో అతడికి మే 9 వరకు ముంబై కోర్టు రిమాండ్ విధించింది.