రాజమౌళి సినిమా అంటే నే అంచనాలు భారీగా ఉంటాయి. ఇక ‘బాహుబలి’ లాంటి మెగా మూవీ తర్వాత చేస్తున్న సినిమాపై అంచనాలు ఎలా ఉంటాయో చెప్పేదేముంది.పైగా ఇందులో జూనియర్ ఎన్టీఆర్, రామ్ చరణ్ లాంటి సూపర్ స్టార్లు హీరోలు.
ఈ చిత్రానికి తమిళంలో మాటలు రాస్తున్న మదన్ కార్కీ. ‘బాహుబలి’కి తమిళంలో మాటలు రాసింది ఇతనే. ఆ చిత్రంలో కాలకేయుల కోసం కిలికి అనే భాషను సృష్టించి సూపర్ పాపులర్ చేసిన ఘనత అతడికే దక్కుతుంది.
‘ఆర్ఆర్ఆర్’ గురించి ఓ ఇంటర్వ్యూలో మాట్లాడుతూ అభిమానులు ఎగ్జైట్ అయ్యే విషయాలు చెప్పాడు మదన్. ‘బాహుబలి’ స్థాయిలో సినిమా ఉంటుందా అని అడిగితే.. ఆ సినిమాకు ఏమాత్రం తగ్గని విధంగా ఉంటుందని.. ఆ సినిమాకు మించిన భారీతనం ఇందులో ఉంటుందని మదన్ తెలిపాడు. ‘ఆర్ఆర్ఆర్’లో ఇద్దరు హీరోలు ఎన్టీఆర్, రామ్ చరణ్‌ల పాత్రల్ని రాజమౌళి అద్భుతంగా తీర్చిదిద్దారని.. ఒక పాత్రను మించి ఇంకోటి ఉంటుందని అన్నాడు. ఈ సినిమాలో ఎమోషన్లు పతాక స్థాయిలో ఉంటాయని.. ‘బాహుబలి’ చూశాక రాజమౌళిపై పెరిగిన అంచనాల్ని ఆయన అందుకుంటారని ధీమా వ్యక్తం చేశాడు మదన్.
బాహుబలి’ లాగే ఈ సినిమా కూడా అన్ని భాషల వాళ్లనూ ఆకట్టుకుంటుందని మదన్ తెలిపాడు. మదన్ మాటల్ని విన్న జనాలు ‘ఆర్ఆర్ఆర్’ మీద అంచనాల్ని మరింత పెంచుకోవడం ఖాయం.