తమిళ్ హీరో సూర్య డైరెక్టర్ కేవీ ఆనంద్‌తో జతకట్టి ‘బందోబస్త్’ అనే సినిమా చేసాడు. సూర్యతో పాటు మలయాళీ సూపర్‌స్టార్ మోహన్‌ల్ కూడా ఈ సినిమాలో నటించాడు.
ఇండియా ప్రైమ్ మినిస్టర్ అయిన చంద్రకాంత్ వర్మ( మోహన్ లాల్) ఇంగ్లాండ్ పర్యటనకు వెళతాడు. అక్కడ ఆయన మీద జరిగిన అటాక్ నుండి రక్షించిన మిలిటరీ ఆఫీసర్ రవి ట్రాక్ రికార్డ్ నచ్చి అతన్ని తన సెక్యూరిటీ వింగ్ ఎస్పీజీకి హెడ్‌గా నియమించుకుంటాడు. అయితే ఆ తరువాత ఎవరో రవికి ఓపెన్‌గా ఛాలెంజ్ విసిరి, చెప్పినట్టుగానే ప్రైమ్ మినిస్టర్‌ని చంపేస్తారు. దాంతో దాన్ని కారణంగా చూపి రవిని ఎస్పీజీ నుండి సస్పెండ్ చేస్తారు. ఇంతకీ ప్రైమ్ మినిస్టర్‌ని చంపింది ఎవరు?, వాళ్ళని రవి ఎలా కనిపెట్టాడు?, ఆ తరువాత కథ ఎలాంటి మలుపులు తిరిగింది అనేది సినిమా చూసి తెలుసుకోవాలి.
అయితే అందరిని ఆకట్టుకునే అంశాలు ఉన్న ఈ కథని స్క్రీన్ ప్లే పరంగా ఇంట్రెస్టింగ్‌గా మలచడంలో మాత్రం అతను విఫలమయ్యాడు. ఈ సినిమాని ఒక మంచి నోట్లోనే మొదలుపెట్టినా కూడా రాను రాను కథలో చలనం లేకపోవడంతో ఆసక్తి సన్నగిల్లుతుంది. ఇక ఇంటర్వెల్ బ్యాంగ్ మాత్రం సెకండ్‌హాఫ్‌పై కాస్త ఆసక్తి రేకెత్తిస్తుంది. కానీ సెకండ్‌హాఫ్‌లో కూడా సినిమా పాసివ్ నోట్లోనే సాగడంతో యాక్షన్ సన్నివేశాలు మాత్రం ఆకట్టుకుంటాయి. కథలోని సస్పెన్స్ పూర్తిగా రివీల్ అయిపోయాక మాత్రం సినిమా ఎలా ఎండ్ అవుతుందా అని కాకుండా, ఎప్పుడెప్పుడు ఎండ్ అవుతుందా అని ఎదురుచూడాల్సిన పరిస్థితి వస్తుంది.
ఈ సినిమాకి మెయిన్ ప్లస్ అంటే సూర్య, మెహన్‌లాల్‌ల నటన అని చెప్పుకోవాలి. ఎలాంటి పాత్ర ఎంచుకున్నా దానికి పూర్తిగా న్యాయం చేసే సూర్య ఈ సినిమాలో కూడా ప్రైమ్ మినిస్టర్ సెక్యూరిటీ ఆఫీసర్‌గా తన పాత్రకు పూర్తి న్యాయం చేసాడు. మోహన్‌లాల్ నటించడం వల్ల ప్రైమ్ మినిస్టర్ పాత్రకు ఉండాల్సిన హుందాతనం వచ్చింది. ఇక వీళ్ళిద్దరిని మినహాయిస్తే మిగతా వాళ్ళు ఓకే అనిపించారు. సయేశా సైగల్,ఆర్య,సముద్రకని,బోమన్ ఇరానీలకు కాస్త స్కోప్ ఉన్న పాత్రలు దక్కాయి.
ఇక సెకండ్‌హాఫ్‌లో ఆర్య ప్రైమ్‌మినిస్టర్ అయ్యాక అతను ప్రవర్తించే విధానం, నడుచుకునే తీరు అన్నీ కూడా బాగా సిల్లీ గా ఉంటాయి. ఇక స్నేహితుడు చనిపోయినప్పుడు సూర్య ప్రైమ్‌మినిస్టర్ కాలర్ పట్టుకోవడం లాంటి సీన్స్ సినిమాతో డిస్‌కనెక్ట్ అయ్యేలా చేస్తాయి. వాటిని నమ్మదగిన విధంగా తీర్చుదిద్దడంలో ఆనంద్ డైరెక్టర్‌గా పరిణితి చూపించలేకపోయాడు.
యాక్షన్ సన్నివేశాలను మాత్రం సూపర్‌గా డిజైన్ చేసారు. స్వతహాగా కెమెరామ్యాన్ కూడా అయిన ఆనంద్ వాటిని తీర్చిదిద్దిన విధానం ఆకట్టుకుంది. కానీ ఆ యాక్షన్ సీన్స్‌కి మూలమయిన సీన్స్ మాత్రం తేలిపోయాయి. దేశభక్తికి సంబందించిన కొన్ని అంశాలు, వాటి తాలూకా సీన్స్ మాత్రం బాగా పండాయి. అలాంటి వాటిలో డైలాగ్స్ కూడా పేట్రియాటిక్ టచ్‌తో ఉండి క్లాప్స్ కొట్టించుకున్నాయి. ఇక ఈ సినిమాకి మరొక ప్రధానమైన మైనస్ పాటలు. హారిస్ జైరాజ్ ఈ సినిమాకి ఇచ్చిన ట్యూన్స్‌లో ఒకటి కూడా అర్ధమయ్యేలా లేదు. పైగా కాస్త బిజీగా సాగుతున్న కథలో ఆ పాటలు రావడం వల్ల చాలా చోట్ల సినిమా ఫ్లో దెబ్బతింది.
సినిమా క్లైమాక్స్‌లో వచ్చే ట్విస్ట్ మాత్రం ఆకట్టుకుంది. సినిమా అంతా కూడా అదే గ్రిప్పింగ్ స్క్రీన్‌ప్లే ఉండి ఉంటే ఫలితం మరోలా ఉండేది. ఇక ఈ సినిమాకి లైకా ప్రొడక్షన్స్ ఎక్కడా కూడా కాంప్రమైజ్ కాకుండా ఖర్చు పెట్టింది. అన్నీ అందుబాటులో ఉన్నా కూడా సినిమాలో సోల్ మిస్ అవ్వడం, కాస్త నాటకీయత ఎక్కువ అవడం వల్ల ఈ సినిమా ఆ జోనర్‌ని ఇష్టపడే వాళ్ళకి మాత్రమే నచ్చే సినిమాగా తెరకెక్కింది.