మెగా హీరో సాయి ధరమ్‌ తేజ్‌ వరుసగా అట్టర్‌ ఫ్లాప్‌లు పడటంతో తప్పనిసరి పరిస్థితుల్లో దాదాపు ఆరు నెలల పాటు కెమెరాకు పూర్తి దూరంగా ఉంటూ వచ్చాడు. ఈ గ్యాప్‌లో తన బాడీ విషయంలో జాగ్రత్తలు తీసుకోవడంతో పాటు నటనను మెరుగు పర్చుకున్నాడు. అదే సమయంలో పెద్ద ఎత్తున కథలు విన్నాడు. ఎన్నో కథలు విన్న మెగా హీరో ఎట్టకేలకు ‘చిత్రలహరి’ అనే చిత్రాన్ని చేసేందుకు కమిట్‌ అయ్యాడు. ఆ చిత్రానికి సంబంధించిన అధికారిక ప్రకటన రావడం, పూజా కార్యక్రమాలు జరుపుకోవడం కూడా అయ్యింది. అయితే సినిమా చిత్రీకరణ మాత్రం ఇన్నాళ్లు వాయిదా వేస్తూ వచ్చారు. ఎట్టకేలకు ఈ చిత్రం షూటింగ్‌ ప్రారంభంకు సంబంధించిన అధికారిక ప్రకటన చిత్ర యూనిట్‌ సభ్యుల ద్వారా వెలువడినది.
టాలీవుడ్‌ వర్గాల నుండి అందుతున్న సమాచారం ప్రకారం సాయి దరమ్‌ తేజ్‌ హీరోగా కిషోర్‌ తిరుమల దర్శకత్వంలో తెరకెక్కబోతున్న ‘చిత్ర లహరి’ చిత్రం షూటింగ్‌ ను ఈ నెల 12 నుండి జరుపబోతున్నారు. ఈ చిత్రంను తక్కువ బడ్జెట్‌లో ప్లాన్‌ చేస్తున్నట్లుగా తెలుస్తోంది. మొదటి షెడ్యూల్‌ను ఏకథాటిగా 40 రోజుల పాటు చేయబోతున్నారు. ఆ షెడ్యూల్‌లోనే సినిమాకు సంబంధించిన దాదాపు 60 శాతం చిత్రీకరణ పూర్తి అవ్వబోతున్నట్లుగా సమాచారం అందుతుంది. మిగిలి ఉన్న 40 శాతం చిత్రీకరణను రెండు షెడ్యూల్స్‌లో మరో నెల రోజుల్లో పూర్తి చేస్తారట. మొత్తంగా ఈ చిత్రంను కేవలం మూడు నెలల్లోనే పూర్తి చేసేందుకు ప్రయత్నాలు చేస్తున్నారు. సినిమాను వచ్చే ఏడాది సమ్మర్‌లో విడుదల చేయాలని కిషోర్‌ తిరుమల ప్రయత్నాలు చేస్తున్నారు. ఈ చిత్రంలో తేజూకు జోడీగా కళ్యాణి ప్రియదర్శన్‌, నివేదా పేతురాజ్‌ లు నటిస్తున్నారు.
