అక్కినేని మూడోత్ర‌యం వార‌సుడు అఖిల్ త‌న పేరుతోనే రూపొందిన అఖిల్ చిత్రంతో ప్రేక్ష‌కుల ముందుకు వ‌చ్చాడు. తొలి సినిమానే ఫ్లాప్ కావ‌డంతో కాస్త నిరాశ‌కి గుర‌య్యాడు. ఆ త‌ర్వాత విభిన్న క‌థాంశంతో హ‌లో, మిస్ట‌ర్ మ‌జ్ను చిత్రాలు చేశాడు. ఇవి బాక్సాఫీస్ ద‌గ్గ‌ర బోల్తా కొట్ట‌డంతో ఆయ‌న నాలుగో సినిమాకి చాలా గ్యాప్ తీసుకున్నాడు. బొమ్మ‌రిల్లు భాస్క‌ర్ ద‌ర్శ‌క‌త్వంలో త‌న నాలుగో చిత్రాన్ని అఖిల్ చేయ‌నుండ‌గా, ఈ చిత్రాన్ని గీతా ఆర్ట్స్ బేన‌ర్‌పై బ‌న్నీ వాసు నిర్మిస్తున్నాడు. అల్లు అర‌వింద్ స‌మ‌ర్ప‌కుడిగా వ్య‌వ‌హ‌రిస్తున్నాడు. కొద్ది రోజుల క్రితం ఈ చిత్రం గ్రాండ్‌గా లాంచ్ కాగా, రెగ్యుల‌ర్ షూటింగ్ నిన్న‌టి నుండి మొద‌లు పెట్టారు. ఇందుకి సంబంధించి ఓ వీడియోని కూడా విడుద‌ల చేశారు చిత్ర బృందం. ఈ చిత్రంలో అఖిల్‌కి త‌ల్లిగా సీనియ‌ర్ హీరోయిన్ ఆమ‌ని న‌టిస్తుంద‌ట. చిత్రంలో త‌ల్లి పాత్ర కీల‌కం కాగా, ఆ పాత్ర‌కి ఆమ‌ని అయితే బాగుంటుంద‌ని ద‌ర్శ‌కుడు ఆమెని ఎంపిక చేశాడ‌ట. గోపి సుంద‌ర్ ఈ చిత్రానికి సంగీతం అందిస్తున్నారు. చిత్రంలో క‌థానాయిక‌గా ఎవరిని ఎంపిక చేశార‌నే దానిపై క్లారిటీ రావ‌ల‌సి ఉంది.
