Posted [relativedate] at [relativetime time_format=”H:i”]
జనవరి 1 న, కొత్త సంవత్సరం తొలిరోజున గుడికి వెళ్లి దేవుడు దర్శనం చేసుకుని స్పెషల్ పూజలు అవీ ప్లాన్ చేసుకుంటున్నారా ? . అయితే మీరు ఆంధ్రాలో వుండే వాళ్ళు అయితే మీ కోరికలో సగమే తీరుతుంది. ఈసారి జనవరి 1 నాడు యధావిధిగా దేవుడు దర్శనం దొరుకుతుంది తప్ప ప్రత్యేక పూజలు చేయరు. ఆలయాలని పండగలు, ఇతర ముఖ్య ఉత్సవాల సందర్భంగా అలంకరించినట్టు అలంకరించరు. ఇది నిజంగా నిజం. ఇందుకు సంబంధించి దేవాదాయ శాఖ అధికారులకి స్పష్టంగా ఆదేశాలు అందాయి.
ఆంధ్రప్రదేశ్ లో తీసుకున్న ఈ నిర్ణయం వెనుక దేవాదాయ శాఖకి అనుబంధంగా పని చేస్తున్న హిందూ ధర్మ పరిరక్షణ ట్రస్ట్ చొరవ కనిపిస్తోంది. ఆంగ్లేయులు అలవాటు చేసిన జనవరి 1 నూతన సంవత్సర వేడుకలు జరుపుకోవడం వైదిక విధానం కాదని హిందూ ధర్మ పరిరక్షణ అభిప్రాయపడింది. ట్రస్ట్ సూచనకు తగినట్టు జనవరి 1 న ఆలయాలకి ప్రత్యేక అలంకారం వంటివి ఏమీ వుండవు. ఇందుకోసం దేవాదాయ శాఖ తరపున అదనపు ఖర్చు ఏమీ చేయరు.
ఓ వైపు టీటీడీ జనవరి 1 న తిరుమల వచ్చే భక్తులు, ప్రముఖుల కోసం విస్తృత ఏర్పాట్లు చేస్తుండగా దేవాదాయ శాఖ ఈ ఆదేశాలు ఇవ్వడం ఆశ్చర్యం కలిగిస్తోంది. జనవరి 1 న కాకుండా ఉగాది రోజు కొత్త ఏడాది సంబరాలు జరుపుకోవడం భారతీయ సంస్కృతిలో ఉన్నప్పటికీ దేవాదాయ శాఖ ఇలాంటి నిర్ణయం తీసుకోవడం మీద కొన్ని డౌట్స్ లేకపోలేదు. బీజేపీ కి చెందిన మంత్రి మాణిక్యాలరావు ఆ శాఖ నిర్వహిస్తున్నందునే ఇలాంటి నిర్ణయాలు వస్తున్నాయని అప్పుడే విమర్శలు కూడా వస్తున్నాయి. దేశమంతా మతవిశ్వాసాలు పెంచి వాటి ద్వారా లబ్ది పొందాలని బీజేపీ చూస్తున్నట్టు ఆరోపణలు వస్తున్నాయి. ఏ చిన్న సందర్భం వచ్చినా ప్రభుత్వం తరపున కార్యక్రమాలు, ఉత్సవాలు నిర్వహించడానికి ఆసక్తి చూపే సీఎం చంద్రబాబు ఇప్పుడు దేవాదాయ శాఖ కి అనుబంధంగా పనిచేస్తున్న హిందూ ధర్మ పరిరక్షణ ట్రస్ట్ ఆదేశాల మీద ఎలా స్పందిస్తారో చూడాలి.
