తమిళ స్టార్ హీరో సూర్య నటించిన తాజా చిత్రం Karuppu (తెలుగులో వీరభద్రుడు) నేడు థియేటర్లలోకి రావాల్సి ఉంది. కానీ అనుకోని అడ్డంకులు చివరి నిమిషంలో అడ్డు పడ్డాయి. దర్శకుడు ఆర్జే బాలాజీ తెరకెక్కించిన ఈ సినిమా, నిర్మాతలకు సంబంధించిన పాత ఆర్థిక బకాయిలు పరిష్కారం కాకపోవడంతో ప్రదర్శన నిలిచిపోయింది. ఫలితంగా ఉదయం, మధ్యాహ్నం షోలు రద్దయ్యాయి. ఈ పరిణామం సూర్య అభిమానులను తీవ్ర నిరాశలోకి నెట్టింది.
ఈ పరిస్థితుల్లో దర్శకుడు ఆర్జే బాలాజీ సోషల్ మీడియాలో ఒక భావోద్వేగ వీడియో సందేశాన్ని విడుదల చేశారు. “నిజంగా క్షమాపణలు కోరుతున్నాను. ఇలాంటి పరిస్థితి వస్తుందని ఊహించలేదు. అన్ని సమస్యలు త్వరలో పరిష్కారమై, ఈ రోజు సాయంత్రం 6 గంటల లోపు సినిమా థియేటర్లలోకి వస్తుందని ఆశిస్తున్నాను” అంటూ ఆయన ఆవేదన వ్యక్తం చేశారు.
దర్శకుడి వీడియో చూసిన నెటిజన్లు ఆయనకు మద్దతుగా నిలుస్తూ సోషల్ మీడియాలో సానుభూతి వ్యక్తం చేస్తున్నారు. డ్రీమ్ వారియర్ పిక్చర్స్ నిర్మించిన ఈ చిత్రంలో త్రిష హీరోయిన్గా నటించారు. మరి సాయంత్రానికి అయినా కరుప్పు థియేటర్లలో సందడి చేస్తుందో లేదో వేచి చూడాల్సిందే.