Posted [relativedate] at [relativetime time_format=”H:i”]
వరుసగా ఏడు విజయాలను అందుకున్న నాని ప్రస్తుతం వేణు శ్రీరాం దర్శకత్వంలో ‘మిడిల్‌ క్లాస్‌ అబ్బాయి’ అనే చిత్రాన్ని చేస్తున్న విషయం తెల్సిందే. ఈ చిత్రాన్ని దిల్‌రాజు నిర్మిస్తున్నాడు. వరుస విజయాలతో ఉన్న నానికి ఈ చిత్రం మరో సక్సెస్‌ను ఇస్తుందనే నమ్మకంతో ఆయన అభిమానులు ఉన్నారు. ‘ఫిదా’ ప్రేక్షకులను ఫిదా చేసిన బ్యూటీ సాయి పల్లవి ఈ చిత్రంలో హీరోయిన్‌గా నటిస్తుంది. నాని, సాయి పల్లవిల జంట ఖచ్చితంగా ప్రేక్షకులను ఆకట్టుకుంటుందనే నమ్మకంతో ఉన్నారు. ఇప్పటికే లీక్‌ అయిన కొన్ని ఫొటోలు సినిమాపై ఆసక్తిని పెంచుతున్నాయి. తాజాగా ఈ చిత్రం ఫస్ట్‌లుక్‌ను విడుదల చేసేందుకు ఏర్పాట్లు చేస్తున్నారు.
దీపావళి సందర్బంగా దిల్‌రాజు నిర్మించిన ‘రాజా ది గ్రేట్‌’ చిత్రం ప్రేక్షకుల ముందుకు రాబోతుంది. దాంతో పాటు నాని హీరోగా నటిస్తున్న ‘మిడిల్‌ క్లాస్‌ అబ్బాయి’ చిత్ర ఫస్ట్‌లుక్‌ను కూడా విడుదల చేయబోతున్నట్లుగా చిత్ర యూనిట్‌ సభ్యులు ప్రకటించారు. మొదట టీజర్‌ విడుదల కానుందని అంతా భావించారు. కాని చివరకు మోషన్‌ పోస్టర్‌ను విడుదల చేయాలని నిర్ణయించారు. ‘రాజా ది గ్రేట్‌’ చిత్రం విడుదల కాబోతున్న దాదాపు అన్ని థియేటర్లలో కూడా నాని మూవీ ఫస్ట్‌లుక్‌ మోషన్‌ పోస్టర్‌ను విడుదల చేసే అవకాశం ఉంది. వచ్చే నెలలో ట్రైలర్‌ను విడుదల చేసి డిసెంబర్‌ చివరి వారంలో చిత్రాన్ని విడుదల చేసేందుకు దిల్‌రాజు ప్రయత్నాలు చేస్తున్నాడు. ఈ సంవత్సరం దిల్‌రాజు నిర్మించిన పలు సినిమాలు విడుదలై దాదాపు అన్ని కూడా మంచి విజయాన్ని సొంతం చేసుకున్నాయి. అందుకే ఈ సినిమా కూడా ఖచ్చితంగా మంచి విజయాన్ని సొంతం చేసుకోవడం ఖాయం అంటూ చిత్ర యూనిట్‌ సభ్యులు నమ్మకంతో ఉన్నారు.
