Posted [relativedate] at [relativetime time_format=”H:i”]
వరుసగా ఏడు చిత్రాలతో విజయాలు దక్కించుకున్న నాని ఎనిమిదవ సక్సెస్‌ను ‘మిడిల్‌క్లాస్‌అబ్బాయి’ చిత్రంతో దక్కించుకోవడం ఖాయం అంటూ ఆయన అభిమానులు నమ్మకంతో ఉన్నారు. వేణు శ్రీరాం దర్శకత్వంలో దిల్‌రాజు ఈ చిత్రాన్ని నిర్మిస్తున్న విషయం తెల్సిందే. ‘ఫిదా’ బ్యూటీ సాయిపల్లవి ఈ సినిమాలో నటించడం వల్ల కూడా అంచనాలు మరింతగా పెరిగాయి. అంచనాలకు ఏమాత్రం తగ్గకుండా దర్శకుడు ఈ సినిమాను తెరకెక్కిస్తున్నాడు. ఈ చిత్రం ప్రారంభం సమయంలోనే క్రిస్మస్‌కు విడుదల చేయాలని నిర్ణయించారు. క్రిస్మస్‌ కానుకగా డిసెంబర్‌ 22న చిత్రాన్ని విడుదల చేయాలని దిల్‌రాజు నిర్ణయించాడు. కాని తాజాగా అందుతున్న సమాచారం ప్రకారం క్రిస్మస్‌కు వారం ముందే అంటే డిసెంబర్‌ 15న చిత్రాన్ని విడుదల చేయాలని నిర్ణయించారు.
అక్కినేని అఖిల్‌, విక్రమ్‌ కుమార్‌ల కాంబినేషన్‌లో తెరకెక్కుతున్న ‘హలో’ చిత్రాన్ని క్రిస్మస్‌ కానుకగా విడుదల చేయాలని నిర్మాత నాగార్జున భావిస్తున్నాడు. ఆ విషయాన్ని దిల్‌రాజుతో చర్చించగా ‘మిడిల్‌క్లాస్‌ అబ్బాయి’ చిత్రాన్ని వారం ముందు విడుదల చేసేందుకు ఓకే చెప్పాడు. దిల్‌రాజు నిర్ణయంతో అఖిల్‌ ఎలాంటి అడ్డు లేకుండా, ఒంటరిగా క్రిస్మస్‌కు రాబోతున్నాడు. మొదటి సినిమాతో సక్సెస్‌ను దక్కించుకోలేక పోయిన అఖిల్‌ ఈ చిత్రంతో అయినా బాక్సాఫీస్‌ వద్ద కలెక్షన్స్‌ను సాధిస్తాడేమో చూడాలి. ప్రస్తుతం సినిమాకు సంబంధించిన చివరి దశ షూటింగ్‌ జరుపుకుంటుంది. అఖిల్‌కు జోడీగా కళ్యాణి ప్రియదర్శిణి నటిస్తున్న విషయం తెల్సిందే. అఖిల్‌ చిత్రం డిసెంబర్‌లో విడుదలవ్వనున్న నేపథ్యంలో అక్కినేని ఫ్యాన్స్‌ ఎంతో ఆసక్తిగా ఎదురు చూస్తున్నారు. అఖిల్‌కు దర్శకుడు విక్రమ్‌ కుమార్‌ అయినా విజయాన్ని తెచ్చి పెడతాడేమో చూడాలి.
