సూపర్‌ స్టార్‌ మహేష్‌బాబు ప్రతిష్టాత్మక ‘మహర్షి’ మూవీ గ్యాప్‌ లేకుండా చిత్రీకరణ జరుపుకుంటోంది. ప్రస్తుతం రామోజీ ఫిల్మ్‌ సిటీలో చిత్రీకరణ జరుపుకుంటున్న ఈ చిత్రంలో హీరోయిన్‌గా పూజా హెగ్డే నటిస్తున్న విషయం తెల్సిందే. కథానుసారంగా ఈ చిత్రంలో మరో హీరోయిన్‌ కూడా ఉంటుందట. ఆ హీరోయిన్‌ పాత్రను బాలయ్య ‘లెజెండ్‌’ చిత్రంలో మరో హీరోయిన్‌గా నటించిన సోనాల్‌ చౌహాన్‌ను నటింపజేస్తున్నట్లుగా సమాచారం అందుతోంది. ఈమె తెలుగులో ‘లెజెండ్‌’, ‘పండగ చేస్కో’ చిత్రాల్లో నటించినా కూడా పెద్దగా సక్సెస్‌ను దక్కించుకోలేక పోయింది. ఆ రెండు సినిమాల్లో కూడా సెకండ్‌ హీరోయిన్‌ పాత్ర అవ్వడం వల్ల ఈమెకు గుర్తింపు రాలేదు. బాలీవుడ్‌లో అడపా దడపా సినిమాలు చేసుకుంటూ కెరీర్‌ నెట్టుకు వస్తున్న సోసాల్‌కు ఈసారి మరో ఛాన్స్‌ దక్కింది.
మహేష్‌బాబు 25వ చిత్రం అవ్వడంతో మహర్షి చిత్రంపై దర్శకుడు వంశీ పైడిపల్లి చాలా శ్రద్ద పెట్టాడు. అల్లరి నరేష్‌ ఈ చిత్రంలో కీలక పాత్ర పోషిస్తున్న విషయం తెల్సిందే. రికార్డు స్థాయిలో అంచనాలున్న ఈ చిత్రంను దిల్‌రాజు, అశ్వినీదత్‌, పీవీపీలు కలిసి సంయుక్తంగా నిర్మిస్తున్నారు. ఈ చిత్రం వచ్చే వేసవి కానుకగా ఏప్రిల్‌లో విడుదల కాబోతుంది. ఇప్పటికే విడుదలైన పోస్టర్‌కు మంచి రెస్పాన్స్‌ వచ్చిన నేపథ్యంలో త్వరలోనే సినిమాకు సంబంధించిన టీజర్‌ను విడుదల చేసేందుకు ఏర్పాట్లు చేస్తున్నారు. విదేశాల్లో బిజినెస్‌ మన్‌గా, రైతు నాయకుడిగా రకరకాలుగా మహేష్‌బాబు ఈ చిత్రంలో కనిపిస్తాడని సినీ వర్గాల వారు అంటున్నారు. మహేష్‌ కెరీర్‌లో ఈ చిత్రం నిలిచి పోతుందంటున్నారు. అలాంటి సినిమాలో ఛాన్స్‌ దక్కించుకున్న సోనాల్‌ చౌహాన్‌కు ఈ చిత్రం ఎలాంటి ఫలితాన్ని మిగిల్చుతుందో చూడాలి.
