Posted [relativedate] at [relativetime time_format=”H:i”]
లక్ష్మీస్ ఎన్టీఆర్ ప్ర‌క‌టించిన త‌రువాత కొన్నిరోజులు దానిపై టీడీపీ నేత‌ల‌తో వివాదం న‌డిపి… వార్త‌ల్లో ఉంచిన రామ్ గోపాల్ వ‌ర్మ వారం రోజులు సైలెంట్ గా ఉన్నారు. లక్ష్మీస్ ఎన్టీఆర్ కు ముందే నాగార్జున‌తో వ‌ర్మ ఓ సినిమా చేయనున్నార‌ని… అందుకే లక్ష్మీస్ ఎన్టీఆర్ గురించి సైలెంట్ అయ్యార‌ని టాక్ వినిపించింది. కానీ ఆ ఊహాగానాల‌కు తెర‌దించుతూ వ‌ర్మ మ‌ళ్లీ త‌న స్ట‌యిల్ లో లక్ష్మీస్ ఎన్టీఆర్ ప్ర‌చారం మొద‌లుపెట్టారు. కొన్నిరోజుల క్రితం ఈ సినిమా తీయ‌డానికి త‌న‌కు అపార‌మైన బ‌ల‌మిస్తున్న ఒకే ఒక శ‌క్తి ఎన్టీఆర్అని, ఆ మ‌హానుభావుడి ఆత్మ రోజూ త‌న క‌ల‌లోకి వ‌చ్చి స్క్రీన్ ప్లే రాయ‌డానికి స‌హ‌క‌రిస్తోంద‌ని హాస్యాస్ప‌ద వ్యాఖ్య‌లు చేసిన వ‌ర్మ తాజాగా మ‌రింత న‌వ్వుపుట్టించే పోస్ట్ ఒక‌టి చేశారు. లక్ష్మీస్ ఎన్టీఆర్ గురించి ఎన్టీఆర్ మాట్లాడుతున్న‌ట్టుగా ఒక వీడియో పోస్ట్ చేశారు వ‌ర్మ. ఆ వీడియోలో ఎన్టీఆర్ చేశార‌ని వ‌ర్మ చెబుతున్న వ్యాఖ్య‌లు ఇవి…
రామ్ గోపాల్ వ‌ర్మ‌గారూ…మిత్రులు అక్కినేని నాగేశ్వ‌ర‌రావు గారు ప‌రిచ‌యం చేయ‌గా… గ‌తంలో మీరొక‌సారి మ‌మ్మ‌ల్ని క‌లిశారు. మేము క‌ర‌చాల‌నం చేశాం. మీ ప్ర‌తిభ గురించి, మేథ‌స్సు గురించి, ప్ర‌జ్ఞాపాట‌వాలు గురించి, మీ వ్య‌క్తిత్వం గురించి అక్కినేని గారు ఆనాడే నాకు మీ ప‌రోక్షంలో వివ‌రించారు. నేను ఇలా అశ‌రీర‌వాణిలా మీకు వినిపించ‌డానికి కార‌ణం మీరు మాపై తీస్తున్న చ‌ల‌న‌చిత్రం. మ‌రుగున‌ప‌డ‌బోతున్న చారిత్ర‌క స‌త్యాల‌ను మ‌రుగున పెడుతున్న‌వారు బ‌తికుండ‌గానే తెర‌కెక్కించే ప్ర‌య‌త్నం మీరు చేయ‌డం నిజంగా సాహ‌సం… సాహ‌సం… సాహ‌సం. ఈ మీ సాహ‌సాన్ని ప్రశంసించ‌డంతో పాటు మీకు, ఈ లోకానికి, నా అర్ధాంగి ల‌క్ష్మికి కూడా తెలియ‌ని కొన్ని అతిముఖ్య‌మైన విష‌యాల‌ను మీకు చెప్ప‌ద‌ల‌చాను….ఎప్పుడేది అవ‌స‌ర‌మో మాకే తెలియును గ‌న‌క ఆ విష‌యాల‌ను మేమే ఇలా అశరీర‌వాణి ద్వారా మీకు మాత్ర‌మే వినిపించి చెబుతాం… ఇక‌పై మా ఏకాంత సంభాష‌ణ మీతోనే..అని ఎన్టీఆర్ వాయిస్ వీడియోలో వినిపిస్తోంది. ఈ వీడియో పోస్ట్ చేస్తూ..వ‌ర్మ హాస్యాస్ప‌దంగా ఓ కామెంట్ కూడా జ‌త చేశారు. సాక్షాత్తూ ఎన్టీఆర్ గారే త‌న‌కీ సందేశాన్ని ఆకాశ‌వాణి ద్వారా పంపార‌ని, ఇది న‌మ్మ‌నివాళ్లంద‌రూ క‌చ్చితంగా న‌ర‌కానికి పోతార‌ని కూడా చెప్ప‌మ‌న్నారు అని వ‌ర్మ వ్యాఖ్యానించారు. మొత్తానికి లక్ష్మీస్ ఎన్టీఆర్ సినిమాను వ‌ర్మ ఎంత క్రియేటివ్ గా తెర‌కెక్కిస్తారో తెలియ‌దు కానీ….ప్ర‌చారాన్ని మాత్రం అత్యంత సృజ‌నాత్మ‌కంగా నిర్వ‌హిస్తున్నారు.
