ఆంధ్రప్రదేశ్ ఉప ముఖ్యమంత్రి పవన్ కళ్యాణ్ తో టాలీవుడ్కు చెందిన ప్రముఖ నిర్మాతల బృందం భేటీ కావడం సినీ వర్గాల్లో ఆసక్తికర చర్చకు దారితీసింది. మంగళవారం రాత్రి రాజమహేంద్రవరంలో జరిగిన ఈ అధికారిక సమావేశంలో, రెండు తెలుగు రాష్ట్రాల్లో చిత్ర పరిశ్రమ భవిష్యత్తుకు సంబంధించిన పలు కీలక అంశాలు ప్రస్తావనకు వచ్చాయి.
ఆంధ్రప్రదేశ్, తెలంగాణ రాష్ట్రాల్లో సినీ పరిశ్రమ విస్తరణ, ప్రస్తుత మార్కెట్ పరిస్థితులు, థియేటర్ వ్యవస్థ, పెట్టుబడులు, ఉపాధి అవకాశాలు వంటి అంశాలపై నిర్మాతలు డిప్యూటీ సీఎంతో సుదీర్ఘంగా చర్చించారు. ఇండస్ట్రీ సమస్యలను శ్రద్ధగా విన్న పవన్ కళ్యాణ్, సానుకూలంగా స్పందించినట్లు సమాచారం.
ఈ భేటీలో మైత్రీ మూవీ మేకర్స్ రవిశంకర్, సూర్యదేవర నాగవంశీ, సాహు గారపాటి, కిలారు వెంకట సతీష్, చెరుకూరి సుధాకర్ వంటి అగ్ర నిర్మాతలు పాల్గొన్నారు. ప్రభుత్వంతో జరిగిన ఈ ఉన్నత స్థాయి చర్చలు రాబోయే రోజుల్లో టాలీవుడ్కు మరింత ఊపునిస్తాయనే ఆశాభావాన్ని నిర్మాతలు వ్యక్తం చేస్తున్నారు.
