బెల్లంకొండ శ్రీనివాస్‌ నటించిన ‘సాక్ష్యం’ చిత్రానికి సెన్సార్‌ బోర్డు నుండి షాక్‌ ఎదురైన విషయం తెల్సిందే. విడుదలకు వారం ముందే సెన్సార్‌ ముందుకు వెళ్లిన చిత్రానికి జంతు సంరక్షణ ఆఫీస్‌ నుండి సర్టిఫికెట్‌ తీసుకు రాలేదు అని, ఈ చిత్రంలో వాడిన జంతువుల గురించిన సర్టిఫికెట్‌ ఇస్తేనే సెన్సార్‌ పూర్తి చేస్తాం అంటూ సెన్సార్‌ బోర్డు వారు అడ్డు చెప్పారు. విడుదల తేదీ దగ్గర పడుతుంది, ఈ సమయంలో ఆ సర్టిఫికెట్స్‌ అంటే ఆలస్యం అయ్యేలా ఉంది. దాంతో అంతా కూడా సాక్ష్యం విడుదల ఆలస్యం అవుతుందని భావించారు. కాని మహారాష్ట్ర గవర్నర్‌ విద్యాసాగర్‌ రావు ఈ విషయంలో చిత్ర యూనిట్‌ సభ్యులకు సాయంగా నిలిచారు.
గవర్నర్‌ విద్యాసాగర్‌ రావు సాయంతో చిత్రంకు సంబంధించిన అడ్డంకులు తొలగి పోయాయి. తాజాగా సెన్సార్‌ కార్యక్రమాలు పూర్తి చేసుకుంది. ఈ చిత్రానికి సెన్సార్‌ బోర్డు సభ్యులు యూ/ఎ సర్టిఫికెట్‌ను ఇవ్వడం జరిగింది. భారీ అంచనాల నడుమ రూపొందిన ఈ చిత్రం సోషియో ఫాంటసీ నేపథ్యంలో ఉంటుందని టీజర్‌ మరియు ట్రైలర్‌ చూస్తుంటే అనిపిస్తుంది. బెల్లంకొండ శ్రీనివాస్‌ స్టైలిష్‌ లుక్‌ మరియు పూజా హెగ్డే గ్లామర్‌ ఈ చిత్రానికి హైలైట్‌గా నిలుస్తుందని చిత్ర యూనిట్‌ సభ్యులు చెబుతున్నారు. భారీ అంచనాల నడుమ ఏమాత్రం అనుమానాలు లేకుండా ఈనెల 27న విడుదల కాబోతుంది. సినీ ప్రముఖుల నుండి విశ్లేషకులు ప్రేక్షకులు కూడా ఈ చిత్రం కోసం ఎంతో ఆసక్తిగా ఎదురు చూస్తున్నారు. ఈమద్య కాలంలో వచ్చిన పెద్ద సినిమాలు అన్నీ కూడా బాక్సాఫీస్‌ వద్ద బొక్క బోర్లా పడుతున్నాయి. దాంతో ఈ చిత్రంపై మరింతగా అంచనాలున్నాయి.
